मैले देशको इज्जत बढाउने गरी जिम्मेवारी पुरा गरेँ : प्रधानमन्त्री दाहाल

 आजको खबर २०७३ कार्तिक २० शनिबार २३:१५:००

काठमाडौँ, २० कार्तिक, प्रधानमन्त्री पुष्पकमल दाहाल प्रचण्डले भारतीय राष्ट्रपति प्रणव मूखर्जीको नेपाल भ्रमण सद्भाव भ्रमण भएको बताएका छन् । नेपाल टेलिभिजनबाट हरेक शनिबार प्रशारण हुने कार्यक्रम 'सिधा कुरा प्रधानमन्त्री'सँग कार्यक्रममा शनिबार प्रधानमन्त्री पुष्पकमल दाहाल 'प्रचण्ड' ले अन्तर्वार्ताको क्रममा उक्त कुरा बताएका हुन् । 

प्रधानमन्त्री दाहालले छठ पर्वको अवसरमा मधेशी समुदाय र देशभित्र र बाहिर रहेका सम्पूर्ण नेपालीहरुमा शुभकामना व्यक्त गरे । उनले भने, 'यस पर्वले राष्ट्रिय सहमतिको वातावरणका लागि सकारात्मक भूमिका खेल्नेछ भन्ने विश्वास लिएको छु ।' 

मुखर्जीको नेपाल भ्रमण

उनले प्रश्नको जवाफ दिँदै भने, 'वर्षपछिको भारतीय राष्ट्रपति महामहिम प्रणव मूखर्जीको नेपाल भ्रमण आफैमा महत्वपूर्ण परिघटना हो । भ्रमण सफल बनाउने दायित्व हामी सबैको थियो, जुन हामीले पुरा गरेका छौँ । उहाँ निकै प्रशन्न भएर फर्कनुभएको छ । भ्रमण सफल र फलदायी भएको छ । २ देशका सरकार र जनताको सम्बन्ध हार्दिक बनाउन भ्रमण महत्वपूर्ण रह्यो ।'

अहिलेको भ्रमण सद्भाव भ्रमण मात्रै भएको भन्दै प्रधानमन्त्री दाहालले नाफा घाटा भन्दा पनि दुई देशको सम्बन्ध सुदृढीकरणका दृष्टिले भारतीय राष्ट्रपतिको नेपाल भ्रमण महत्वपूर्ण भएको दाबी गरे । यसले विश्वभरि राम्रो सन्देश दिएको भन्दै नेपालले उच्चस्तरीय भ्रमणको आयोजना गर्न सक्षम छ भन्ने सन्देश गएको बताए । उनले भने, 'नेपाल सरकारको क्षमताको पुष्टि भएको छ । भ्रमण व्यवस्थित, अनुशासित र सक्षमतापूर्वक पुरा भएको छ । यो भ्रमणले चीनियाँ राष्ट्रपतिको भ्रमणलाई सकारात्मक सन्देश पनि गएको छ ।'

'भारत भ्रमणमा व्यापार घाटा र आयोजनाका बारेमा कुरा भएको छ' उनले भने, 'विगतका सबै समस्या समाधानको प्रयत्न भएको छ । राष्ट्रपति आउँदा कुनै सम्झौता गर्ने एजेण्डा थिएन ।' १९५० को सन्धिबारे प्रवुद्ध समूहले तयारी गरिरहेकोले यसले सबै सन्धिको पुनरावलोकन गर्ने उनले बताए । त्यसकारण यो विषयलाई अहिले भ्रमणको एजेण्डा बनाउन आवश्यक नठानिएको उनको भनाई थियो । 

प्रधानमन्त्री दाहालले भने, 'भारतीय राष्ट्रपतिको भ्रमणका क्रममा नेपालको समग्र स्थिति र नेपाल—भारत सम्बन्धबारे खुलेर कुरा भयो । सबै नेताहरुले खुलेर छलफल गर्ने अवसर मिल्यो । त्रीदेशीय साझेदारी धेरै वर्षदेखि उठाएको प्रश्न हो । गोवामा पनि त्रीदेशीय साझेदारी कुरा भएको छ । यसमा भारत पनि विपक्षमा छैन । त्रीदेशीय समझदारीमा भारत र चीन दुवैको सकारात्मक प्रतिक्रिया नै थियो । भारतले त्रीदेशीय समझदारी राम्रो हो । तर, कार्यान्वयन गर्ने समय आइपुगेको छैन भन्ने प्रतिक्रिया दिएको थियो । चीनको त समर्थन नै थियो । भारतीय राष्ट्रपतिको भ्रमणका बेला पनि त्रीदेशीय समझदारीको कुरा गरेको छु । मलाई विश्वास छ, यो प्रस्ताव अगाडि जान्छ ।'

मैले देशको इज्जत बढाउने गरी जिम्मेवारी पुरा गरेँ

प्रधानमन्त्री दाहालले भने, 'भारतीय राष्ट्रपति नेपाल आउने कार्यक्रम पहिले नै तय भएको हो । भ्रमणको निम्तो सम्माननीय राष्ट्रपति विद्यादेवी भण्डारीले गर्नुभएको हो । अतिथिलाई सम्मान गर्नु अराष्ट्रवाद हो भने मेरो भन्नु केही छैन । आफै अतिथि बोलाएर अपमान गर्ने सोंच राम्रो होइन । मैले जिम्मेवारीपूर्वक काम गरेँ । मैले देशको इज्जत बढाउने गरी जिम्मेवारी पुरा गरेकोमा खुसी छु । भ्रमणबारेका अरु टिकाटिप्पणीबारे म अहिले केही भन्दिनँ ।'

बाटो खाली गरेर विश्वभरको प्रचलन मानेका हौँ

उनले थपे, 'केही समय अघि म भारतको राजकीय भ्रमणमा गएँ । म त्यहाँ जाँदा पनि भारतको यातायात ठप्प पारिएको थियो । त्यहाँ पनि बाटो खाली गरिएको थियो, यात्रुहरु कुरेर बसेका थिए । यो विश्वभरिकै प्रचलन हो । हामीले विश्वभरको प्रचलन मानेका मात्र हौँ । हामीले छुद्र टिप्पणी गरेर अन्तर्राष्ट्रिय सम्बन्ध र मान्यतालाई बिर्सन खोजेका त होइनौँ ? यस्तो छुद्रतापूर्ण टिप्पणी राम्रो हुँदैन ।'

भारतीय राष्ट्रपति आउँदा सार्वजनिक विदा चाहिँ किन नि भन्ने प्रश्नमा प्रधानमन्त्री दाहालले भने, 'भारतीय राष्ट्रपति आउँदा बिदा दिने कि नदिने भन्नेबारे राष्ट्रपति समेतको उपस्थितिमा छलफल भएको हो । परराष्ट्र र सुरक्षाका अधिकारीहरुको पनि राय आएपछि सम्मान र व्यवस्थापन दुवैका दृष्टिले सही हुन्छ भन्ने मानेर बिदा गरेको हो । यसले देशलाई कुनै घाटा भएको छैन । सम्बन्धलाई सुदृढ गर्न मद्दत नै पुगेको छ । काठमाडौँमा मात्रै गर्न सकिन्थ्यो भन्ने कुरामा म सम्मान गर्छु । तीतो टिप्पणी गर्ने साथीहरुले अरु सम्मानित संस्थाहरुलाई बचाउनु भयो, त्यसैमा खुसी छु ।'

चीनियाँ राष्ट्रपतिको नेपाल भ्रमण हुन्छ 

प्रधानमन्त्रीले भारतीय राष्ट्रपतिले हाम्रो राष्ट्रपतिलाई भारत भ्रमणको निम्तो दिएको जानकारी दिए । उनले भने, 'हामी सल्लाह गरेर राष्ट्रपतिजीको भारत भ्रमणको समय तय गर्छाैं । गोवामा भएको छलफलमा चीनियाँ राष्ट्रपतिले प्रष्ट भाषामा नेपाल आउँछु भन्नुभएको छ । म विश्वस्त छु, समय अलिकति लाग्ला । तर, चीनियाँ राष्ट्रपतिको भ्रमण हुन्छ ।'

भुटानी शरणार्थी फिर्ता लैजान्छु भनेनन्

उनले भने, 'भुटानी प्रधानमन्त्रीसँग भुटानी शरणार्थी, कनेक्टिभिटी, यातायात लगायतका विषयमा कुरा भएको छ । गोवामा भएको भेटमा भुटानी शरणार्थी समस्याबारे मैले गम्भीरतापूर्वक कुरा राखेको छु । भुटानी प्रधानमन्त्रीले नेपालले गरेको प्रस्तावलाई गम्भीर रुपमा लिन्छु भन्नुभएको छ, शरणार्थी लैजान्छु नै भनेर भन्नुभएको छैन ।'

युवा रोजगारीको विषयमा नयाँ योजना

प्रधानमन्त्रीले भने, 'सरकारले युवाहरुलाई रोजगारी दिनेबारेमा नयाँ योजना सोच्दैछ । सरकारले यसबारे नयाँ सोच बनाउँदैछ । हामी यसलाई गम्भीरपूर्वक लिएका छौँ । संसदमा मैले गरिबका लागि सरकार, युवा स्वरोजगार कार्यक्रम, जनता पेन्सन लगायतका कुराहरु मैले घोषणा गरेको छु । अब हामी कार्यान्वयनको प्रक्रियामा छौँ, छिटै नतिजा आउँछ । यसले फेरि जनतामा नयाँ उत्साह आउँछ ।'

संविधान संशोधनकोलागि सरकारमा सहभागी दलहरुको म्याण्डेड

उनले भने, 'संविधान संशोधनको तयारी सरकारको नेतृत्व लिएदेखि नै भइरहेको छ । सरकारले प्रारम्भमा वातावरण बनाउनेतिर सोच्यो । आन्तरिक एकता सुदृढ गर्ने, संविधानको स्वीकार्यता बढाएर निर्वाचनमा जाने मेरो हुटहुटी थियो । मेरो तिव्रतापूर्वक अगाडि जाने मनसाय थियो । आन्तरिक तयारी, सत्तापक्ष, प्रतिपक्ष र आन्दोलनकारी समेतसँग छलफल गरेर टुङ्ग्याउन लाग्दा समय लाग्यो । मैले सरकारमा सहभागी दलहरुको म्याण्डेड लिएको छु । पूर्ण सहमति नभए पनि संघीय गठबन्धनको पनि संशोधन प्रस्ताव दर्ता गर्दा हुन्छ भन्ने कुरा आएको छ । म्याण्डेड पाएको छु, मिलेर पारित गरेर जान्छौँ ।'

उनले अगाडि भने, राष्ट्रिय मुद्दाहरुमा समझदारी बनाउन मेरो जोड हुने गरेको छ । हामीले सबै मुद्दाहरुको मिलेर किनारा लगाउँछौं । महाअभियोग पनि समझदारी भएर टुङ्गिन्छ । त्यसमा अब शंका गर्ने ठाउँ छैन । सबैको समझदारी जुट्छ । अख्तियारलाई सरकारले अझ प्रभावकारी र पारदर्शी बनाउँछ । महाअभियोगले अख्तियार कमजोर हुँदैन, झन् बलियो हुन्छ ।'

राष्ट्रिय उद्योगहरु प्रवद्र्धन गर्ने संकल्प

प्रधानमन्त्री दाहालले भने, 'सरकारले यसपटक ठोस काम नै गर्दैछ । हेटौडा कपडा उद्योग लगायतका उद्योगहरु सञ्चालन हुँदैछ । हामीले छिटै सञ्चालन गर्छाैं । त्यसैगरी नेपाल औषधि लिमिटेडले आधारभूत औषधि छिटै उत्पादन गर्छ । राष्ट्रिय उद्योगहरु प्रवद्र्धन गर्ने हाम्रो संकल्प छ, यसमा हामी प्रभावकारी रुपमा अघि जान्छौँ ।' (प्रधानमन्त्री दाहाललाई सोधिएका प्रश्नको जवाफमा आधारित)

Labels: politic news